Usı jıldıń 6 -iyun kúni Dene tárbiyası hám sport boyınsha qánigelerdi qayta tayarlaw hám qánigeligin asırıw institutı Nókis filialında Qaraqalpaqstan Respublikası Jaslar siyasatı hám sport ministiri w. w. a. A. Allanazarov basshılıǵında jıllıq rejeniń orınlanıwı hám birden-bir “ERP sport” elektron basqarıw sisteması jumısın jedellestiriw boyınsha jıynalıs bolıp ótti.
Jıynalısqa Instituttıń Nókis filialı direktorı Q. Mamutov, sport mektepleri direktorları hám sport bas basqarmaları rayon bólimleri xızmetkerleri qatnastı. Ministrlik hám de sport salasındaǵı hár qanday informaciyalıq sistemalar, elektron platformalar, portallar, mobil qosımshalar hám de elektron maǵlıwmatlar bazaları birden-bir “ERP sport” sisteması sheńberinde ámelge asırılıwı haqqında informaciya berildi.
